Павлодарлық жас астроном IAYC халықаралық лагеріне қатысады

Подробности

Категория: Техника мен ғылым бөлімі

Жарияланды: 30.11.-0001 05:00

Юный астроном из Павлодара поедет в престижный международный лагерь IAYC

Юный астроном из Павлодара поедет в престижный международный лагерь IAYC

Павлодар қаласының астрономияға құмар жоғары сынып оқушысы Мирали биыл жазда әлемнің ең беделді жас зерттеушілеріне арналған жобаларының бірі — International Astronomical Youth Camp (IAYC) халықаралық астрономиялық жастар лагеріне қатыспақ. Ол байқау негізінде іріктеуден сәтті өтіп, әлемнің 30-дан астам елінен жиналған жетпістей жаспен бірге бірегей ғылыми ортаға қосылады.

Миралидің ғарышқа деген қызығушылығы бұл оқиғадан әлдеқайда бұрын басталған. Ол — Павлодар қаласындағы Назарбаев Зияткерлік мектебінің (химия-биология бағытындағы) 11-сынып оқушысы. Мектеп қабырғасында астрономиямен белсенді айналысып қана қоймай, өзі ұйымдастырған астрономия үйірмесінде қатарластарына білімін бөлісіп жүр. Сонымен қатар Мирали — М.М. Катаев атындағы Оқушылар сарайы жанындағы «Антарес» астроклубының тәрбиеленушісі. Ол Павлодар облысының астрономиядан құрама командасының мүшесі және Республикалық Астротурнирде өңір намысын қорғаған.
IAYC лагері 1969 жылдан бері өткізіліп келеді және жыл сайын Еуропаның әртүрлі елдерінде ұйымдастырылады. Оның басты мақсаты — астрономия мен ғылымға қызығушылығы бар дарынды жастарды бір ортаға біріктіріп, оларды бірлескен зерттеу, оқу және мәдени іс-шаралар арқылы дамыту. Үш апта бойы қатысушылар тәжірибелі менторлардың жетекшілігімен ғылыми жобалармен айналысады, жұлдызды аспанды бақылап, астрономия саласындағы тың идеяларды талқылап, түрлі елден келген құрдастарымен тәжірибе алмасады.
Ғылыми топтардағы тақырыптар да әртүрлі: метеорларды бақылау, қара құрдымдар модельдерін жасау, астрофотография, астероидтардың орбиталарын талдау және т.б. Барлық сабақтар мен қатысушылар арасындағы қарым-қатынас тек ағылшын тілінде өтеді. Бұл олардың ғылыми сауаттылығымен қатар, коммуникативтік дағдыларын да дамытуға сеп болады.
IAYC-ке шақырту — бұл Миралидің білім деңгейінің, табандылығы мен ғылыми әлеуетінің жоғары бағалануы. Бұл оқиға оның болашақ ғалым, инженер немесе зерттеуші ретіндегі жолындағы маңызды кезеңге айналуы мүмкін.
Миралиді, оның ұстаздары мен тәлімгерлерін осы жетістігімен шын жүректен құттықтаймыз! Еуропа аспанындағы жұлдыздар астында шабытқа, жаңа білімге және жарқын жаңалықтарға толы сәттер тілейміз!